Psa 50 | MEU | STEP | Goada-bada Diravana Iehova, vada e hereva, tanobada vada e boiria, dina e daemu gabuna amo ela bona dina e dihomu gabuna.

Psalms 50

1 Goada-bada Diravana Iehova, vada e hereva,
tanobada vada e boiria,
dina e daemu gabuna amo
ela bona dina e dihomu gabuna.
2 Siona, hairai-herea gabuna, amo
Dirava diarina e taramu.
3 Eda Dirava na e maimu, asine mai kumamu,
ia vairanai na lahi hururu-hururuna,
lai gubadia ese e gegea ahumu.
4 Ia ese guba atai ai e boi heniamu, tanobada danu e boi heniamu,
ena orea taudia baine hahemaoro henidia totona.
5 “E abidadama henigumu taudia ba haboudia egu” e tomu,
“idia ese boubou karadia e kara, lau ida a herohemaino”.
6 Guba ese ena kara maoromaoro e gwauraimu,
badina be Iehova sibona na hahemaoro tauna. (Selah)
7 Egu orea taumui e, a hakala, lau baina hereva;
Israel e, baina habadelaimu.
Lau na Dirava, emui Dirava.
8 Asina gwau henimuimu emui boubou daidiai;
emui ḡole-oho bouboudia na lau vairagu ai nega idoinai.
9 Boromakau maruanena ta emui ruma amo basina abia,
nani maruanena ta emui maḡu amo basina abia dae;
10 badina be uda ḡaudia iboudiai na lauegu,
bona ororo daha-ta boromakaudia danu;
11 atai manudia iboudiai be dibagu,
tano paka ai e laomu ḡaudia iboudiai na egu.

12 Bama hitolo, umui basinama hamaoromui;
badina be tanobada mai anina idoinai ida na lauegu.
13 Boromakau mamaruanedia hidiodia na animu a?
Nani raradia na inumu a?
14 Hahenamo na Dirava ba henia, emui boubou bunai;
emui gwauhamata anidia ihamomokanidia na Herea Mikamika ba henia.
15 Hekwakwanai dinana ai lau ba boi henigu;
bena lau ese umui baina hamaurimui,
bona umui ese lau ba imodaigu.

16 A kara dika taudia na
Dirava ese e hereva henidiamu, e tomu:
Badina be dahaka egu taravatu o gwauraimu?
Dahaka dainai egu gwauhamata herevadia na udumui bibinadia ai mimia?
17 Badina be mata-hakani o inai heniamu,
bona egu hereva na murimui ai o negediamu.
18 Henao tauna o itaiamu negana ai o hetura heniamu;
bona heuda-hanai taudia o bamodiamu.
19 Hereva dikadia na udumui amo e lasimu,
malamui na hereva koikoidia e gwauraimu;
20 o helaimu, tadikakamui o habadelaidiamu,
sinamui natudia mamaruanedia o habadelaidia koikoimu.
21 Ini vada o kara toma, asina hereva;
umui banava oto lau na umui heḡereḡeremui.
A harihari na gwau henimuimu,
egu hahebade na vairamui ai na gwauraiamu.
22 Ina na ba laloa, Dirava o laloa boiomu taumui,
baina daremui, bena ta ese basine hamaurimui diba, na garina.
23 Hahenamo e mailaiamu tauna na ena boubou bunai,
una tau ese e matauraigumu.
Ena mauri dalana e reḡua namonamomu tauna na
Dirava ena hahemauri baina haheitalaia.